• sana_001mishra 265w

    Dosti

    Aapki rooh se jo huye
    roobaroo hum,
    waqt ne bhi hasna sikh liya.
    Gila na kiya humse aur,
    waqt ne bhi muskurahat ka 
    chaadar odh liya.

    Huye khafa humse
    gham aur tanhaayi.
    Bole, "begaana kar diya 
    hume aaj, uske chalte -
    aisi bhi kya amrit hai 
    uske sangat me?"
    Humare labzon Ko
    toh mauka bhi na mila,
    jawab degaya aapka
    khusnuma andaaz.

    Tashreef laaye aap
    is nacheez ki zindagi me,
    thaama is berukhi si haath ko -
    pata nahi kitni shiddat se 
    humari rooh ne 
    muddat maangi hogi
    jo aapko bheja kayanat ne
    humari dost banakar.

    Aye dost,
    dosti chiz kya hoti hai
    yeh toh pata thi hume,
    par saath nibhaane ke liye
    koi saathi na tha.
    Aap aaye toh pata chala
    dosti ki meethaas kya hoti hai.

    Hum toh woh dost hain
    jo bewafaai pe bhi 
    wafa ka naqaab chadha de.
    Aur aap bhi kya 
    kamaal ke dost nikle,
    hume mauka hi nahi diya
    kabhi naqaab chadhane ka.

    Woh bhi kya haseen pal the,
    jo guzre ek dusre se
    guftagu karne me.
    Aaj dekhiye,
    faaslo ka takalluf 
    aagaya bich me.
    Par dosti humari
    kuch aisi rang laayi
    ke dooriyan dooriyan na lagi,
    nazdikiyon se badhkar hogayi.

    Aye dost!
    Kya khub dosti nibhayi aapne,
    shikwa na kar paaye hum aaj tak.
    Dosti ki meethaas toh thi hi amrit,
    kadwahat bhi meethi lagegi,
    yeh na socha tha humne.

    Aye dost!
    Khusnaseeb hain hum,
    jo aapki dosti naseeb huyi hume.
    Bas yunhi saath chalte rahe
    toh zindagi bhi haar maan jaye,
    fir yeh faasle kya chiz hain.


    ©sana001_mishra